Category : Poems

Sub Category : N/A

ਖੇਡ ਅਨੋਖਾ
     ਭਰ ਕੇ ਡੁੱਲਣਾ ਸੌਖਾ ਹੈ, 
     ਖਾਲੀ ਨੂੰ ਭਰਨਾ ਔਖਾ ਹੈ। 
      ਇਹ ਖੇਡ ਬੜਾ ਅਨੋਖਾ ਹੈ, 
    ਹਰ ਇੱਕ ਨੂੰ ਮਿਲਦਾ ਮੌਕਾ ਹੈ।।
ਕੋਈ ਰੋਂਦਾ ਰੋਟੀ -ਜੁੱਲੀ ਨੂੰ, 
ਕੋਈ ਲੱਭੇ ਸੋਹਣੀ ਕੁੱਲੀ ਨੂੰ। 
    ਪਰ ਮਿਹਨਤ ਕਰਨਾ ਔਖਾ ਹੈ, 
    ਹੱਡਭੰਨ -ਖੁਰਨਾ ਔਖਾ ਹੈ। 
ਇਹ ਖੇਡ ਬੜਾ..............। 
    ਸੌਖਾ ਹੈ ਕਹਿਣਾ ਤੇ ਸੁਣਨਾ ਵੀ, 
ਪਰ ਕਠਨ ਹੈਸਮਝਾ ਜਾਣਾ, 
ਕੁਝ ਆਪਣੇ ਵਰਤੇ ਤਜਰਬਿਆਂ ਚੋ
ਕਿਸੇ ਹੋਰ ਨੂੰ ਰਾਹੇ ਪਾ ਜਾਣਾ। 
ਕੁਝ ਗੱਲ ਕਰਨੀ ਹਯਾਤੀ ਦੀ, 
ਕੁਝ ਆਪਣਾ ਦੁੱਖੜਾ ਰੋ ਜਾਣਾ। 
ਕੁਝ ਹੰਝੂ ਵਗਣੇ ਪਛਤਾਵੇ ਦੇ, 
ਤੇ ਆਪਣਾ ਅੰਦਰ ਧੋ ਜਾਣਾ। 
ਕੁਝ ਰੋਸੇ ਜਾਹਰ ਕਰ ਦੇਣੇ, 
 ਕੁਝ ਅੰਦਰੋਂ ਅੰਦਰ ਸਹਿ ਜਾਣਾ। 
ਤੱਕਣਾ ਕਦੇ ਕੀੜੀਆਂ ਨੂੰ ਵੀ, 
ਕਦੇ ਜਿਦਾਂ  ਲਾਉਣੀਆਂ ਬਾਜਾਂ ਨਾਲ, 
ਪਰ ਡਾਰੀ ਭਰਨਾ ਔਖਾ ਹੈ। 
ਇਹ ਖੇਡ ਬੜਾ................। 
ਇਹ ਜਿ਼ੰਦਗੀ ਦੇ ਝਮੇਲੇ ਨੇ, 
ਵੱਖੋ ਵੱਖਰੇ ਮੇਲੇ ਨੇ, 
ਕੋਈ ਭੀੜਾਂ ਵਿੱਚ, ਤੇ ਕਈ ਇੱਕਲੇ ਨੇ, 
ਦਰ ਸਭ ਨੇ ਆਪਣੇ -ਆਪਣੇ ਮੱਲੇ ਨੇ। 
ਕੋਈ ਰੋਵੇ ਆਪਣੇ ਕੰਮਾਂ ਨੂੰ, 
ਕੋਈ ਖੜ੍ਹਾ ਉਡੀਕੇ ਯੰਮਾਂ ਨੂੰ। 
ਸਭ ਅੱਖੋਂ ਉਰੇ ਭਰੋਖਾ ਹੈ। 
ਇਹ ਖੇਡ ਬੜਾ ਅਨੋਖਾ ਹੈ, 
ਹਰ ਇੱਕ ਨੂੰ ਮਿਲਦਾ ਮੌਕਾ ਹੈ, ਭਰ ਕੇ ਡੁੱਲਣਾ ਸੌਖਾ ਹੈ, 
ਖਾਲੀ ਨੂੰ ਭਰਨਾ ਔਖਾ ਹੈ।।
            ਰਣਜੀਤ ਕੌਰ ਬਾਜਵਾ 
            (ਪੰਜਾਬੀ ਅਧਿਆਪਕਾ)