Category : Poems

Sub Category : N/A

| सरकलेले पाय |

आनंद झाला मला काहीतरी मिळवलं होतं मी
डबक्यातील ग्लासभर पाण्यात सामावलो होतो मी,
कोठेतरी दोन लोकांमध्ये थोडा पुढे होतो मी
पण जमीनीवरचे पाय कधी सरकले हे जाणलेच नाही मी ||

मोठी मोठी स्वप्ने पाहत हसत होतो मी
भराभरा वाटा तुडवत चालत होतो मी,
छोट्याशाच पंखांनी भरारी घेत होतो मी
पण जमीनीवरचे पाय कधी सरकले हे जाणलेच नाही मी ||

इतरांची पर्वा सोडून लढत होतो मी
ज्ञानाचे घास भसाभसा गिळत होतो मी,
मोठाल्या खुर्च्याच सतत पाहत होतो मी
पण जमीनीवरचे पाय कधी सरकले हे जाणलेच नाही मी ||

यशाच्या नावेत बसून सागराला आव्हान देत होतो मी
विजयी पताका हाती घेऊन नाचत होतो मी,
माझ्याच मनातून जगाचा राजा झालो होतो मी
पण जमीनीवरचे पाय कधी सरकले हे जाणलेच नाही मी ||
:~ आदेश कोळेकर (०१/०३/२०२१)
वेळ:०५:०६