Category : Poems

Sub Category : N/A

! माझी मराठी !

माझी मराठी,माझी मराठी
खडकाखडकांतून ओघळणारी
मनामनांना बांधत भरारी घेणारी
माझी गगनचुंबी मराठी ||{१}

धावत्या वाऱ्याचा सूर शिकणारी
घोड्यांच्या टापा ऐकत जगणारी
कोकीळेचा आवाज हृदयात कोरणारी
माझी संगीतमय मराठी ||{२}

चंद्रभागेत न्हाऊन निघणारी
भीमा इंद्रायणीत डुंबणारी
धबधबा होऊन अंधारावर प्रहार करणारी
माझी निर्मळ मराठी ||{३}

कधी लोकनृत्यावर थिरकणारी
ढोलकीच्या तालात रंगणारी
कधी शिट्ट्यांनी दाद देणारी
माझी घुंगराच्या भाषेची मराठी ||{४}

राजा सर्जाला पुजणारी
नांगराला ओव्यांनी कुरवाळणारी
काळ्या भुईतून सोने पिकवणारी
माझ्या बळीराजाची मराठी ||{५}

घाटाघाटातून वारी चालणारी
विठूनामाचा जयघोष करणारी
चंदन-बुक्याने न्हाऊन निघणारी
माझ्या सावळ्याची मराठी ||{६}

कधी आखाड्यात रमणारी
लाल मातीत शड्डू ठोकणारी
गद्यांची रांग लावणारी
आमच्या पैलवानांची मराठी ||{७}

रोज जीवनाच्या शाळेत
बाकावर बसून ज्ञान शिकणारी
सुख-दुःखांच्या शाबासकी,छड्या खाणारी
माझी संस्कारक्षम मराठी ||{८}

जन्मतःच शिवबा वाचणारी
भगव्याचा मान राखणारी 
गडकिल्ले जपण्यास झगडणारी
माझ्या छत्रपतींची मराठी ||{९}

साहित्यावर प्रेम करणारी
लेखणीतून समाज बदलणारी
ग्रंथ पुस्तके जगणारी
माझी साहित्याची मराठी ||{१०}

:~ आदेश कोळेकर (२५/०२/२०२१)
@वेळ:०९:०४