Category : Poems

Sub Category : N/A

|| ध्येयाचा रस्ता ||

दिसतोय आज कंदील
आत्मविश्वासाचा मावळतीला कललेला,
तरीही घाबरून थांबू नकोस
ध्येयाचा रस्ता आहे तुजसाठी खुला ||

अरे आकाश सारे मोहांचे
भेदून जाणार तुच होतास,
भितोस काय या झुडपांना
अडथळ्यांतून वाट शोधणारा तुच होतास ||

मार्ग जरी हा आहे माणसा
तुझ्या डोळ्यांना अनोळखी,
जन्मतः हे जग स्वप्नांचे, मायेचे
कोठे होते पायांना तुझ्या ओळखी ||

पायवाटा कित्येक अडथळ्यांच्या
नागमोड्या पार केल्या आहेत तू ,
मग एवढी मोठी ही वाट यशाकडे जाणारी
सोडून मध्येच इथेच का उभा आहेस तू ||
:~ आदेश कोळेकर (०९/०३/२०२१)
वेळ:०७:२३