Category : Poems

Sub Category : N/A

# माहित नाही रंग हे काय काय करतील #

माहित नाही रंग हे काय काय करतील
मिश्रणातून क्षणोक्षणी नाती किती जोडतील,
पिवळसर नारंगी रंग सूर्यनारायणाला घेऊन येतील
तर हिरवे पिवळे रंग समृध्दीचे दर्शन देतील ||

माहित नाही रंग हे काय काय करतील
तिरंग्यात सामावून आम्हाला एक करतील,
कधी रंगीबेरंगी इंद्रधनुला पाठवून देतील
तर निळसर शुभ्र रंग आकाशाला गवसणी घालतील ||

माहित नाही रंग हे काय काय करतील
कधी काळा पांढरा होऊन रंगभेद आणतील,
कधी विभिन्न रूपांनी रंगभूमी सजवतील
तर कधी न बोलता भावना पोहोचवतील ||

माहित नाही रंग हे काय काय करतील
फुले होऊन गुलाबाचे नाती दोन जोडतील,
कधी भगवा होऊन शिवरायांचे विचार देतील
तर कधी कुंचल्यासोबत येऊन चित्रही रंगवतील ||
:~ आदेश कोळेकर (१४/०२/२०२१)
वेळ:०७:५२