Category : Poems

Sub Category : N/A

👩‍⚖️👩‍🎓सावित्रीच्या लेकी सांग👩‍🎓👩‍⚖️

कंदीलाच्या मंद प्रकाशात 
सूर्य रेखाटतेयस ना तू,
सावित्रीच्या लेकी सांग
शिक्षणाचा वसा पुढे नेतीय ना तू ||

काळ्या रंगाच्या पाटीवर
शुभ्र लिहितेयस ना तू,
सावित्रीच्या लेकी सांग
रंगभेद संपवतेय ना तू ||

पुस्तकातील पानामधली
कविता गातेय ना तू,
सावित्रीच्या लेकी सांग
सद्विचारांचे सूर उमटवतेय ना तू ||

ज्ञानसागर गाठण्याचा
दृढ निश्चय करतेय ना तू,
सावित्रीच्या लेकी सांग
माणुसकीची नदी जगभर नेतेय ना तू
:~ आदेश कोळेकर (११/०२/२०२१)
वेळ:०८:२०