"To Long Phi Ki Nongleh Ia Ka Ktien,bad Ym Tang Ki Nongsngew,(Be Doers Of The Word And Not Hearers Only)" Read Count : 128

Category : Notes/work

Sub Category : N/A
Nga Pdiang sngewbha ia phi baroh kiba ioh ban pule ia kane ka khubor na kane ka Website ha ka kyrteng ba thiang bad ba donbor tam jong U Trai bad U Nongpynim jong ngi,U Jisu Khrist. 


Shuwa ba ngin iaid shakhmat to ngin ia duwai,Ah Blei nga ainguh ia me ba me ai ia ngi kane ka lad ba ngin ioh ban sngap ia kane ka Khubor na ka ktien bakhuid,jong me ha kane ka Website, Ah Blei Plie ia ki Jingkhangiit ka bneng,kren ha ngi bad ai ba kaei kaei kaba ngan thoh kan long ha ka Jingialam jong U Mynsiem bakhuid,Sngew ah Blei ia ka Jingduwai jong ngi,Naba ia kine baroh nga duwai ha ka kyrteng  ba thiang bad ba donbor tam jong U Trai bad U Nongpynim jong ngi,U Jisu Khrist.  Amen

Ha kane ka Por nga kwah  ba ngin ia Puson lang shaphang kawei ka Phang kaba shon bha ha ka dohnud bad ka Jingmut jingpyrkhat jong nga, Ka Phang"
To long phi ki Nongleh ia ka ktien,bad ym tang ki nongsngew(Be doers of the word and not hearers  only)" kaba la pynshongnongrim  na ka Shithi U Jakob lynnong 1:22-25
Ki ktien ba ong kumne "Te To long phi ki nongleh ia ka ktien,bad ym tang ki nongsngew,da kaba shukor noh ia lade hi.Naba lada uno uno ruh u long u nongsngew ia ka ktien,bad ym U nongleh,une u long kum U briew uba khmih thuh ia ka khmat ka met jong u ha ka iit khmih: namar u la khmih thuh ia lade,bad u la leit noh,bad kumne kumne ruh  u la klet noh uba kumno u la long.Hynrei Jar uba iaikhmih thuh sha ka rukom ba janai,kaba ka jong ka jingpynllaitluid,bad u iaineh,une haba um long u nongsngew uba klet noh,hynrei u nongleh ia ka kam,un long uba suk ha kata ka jingleh jong U".

Paralok baieit  jong nga,Ngi im ha ki sngi ba bun na ngi Ki Khristan
ngim im ka Jingim kaba ka Bible ka hikai ia ngi 
Kaba pyni ba ngi long ki nongsngew ,ym ki nongleh
Hynrei ha ka Shithi U Jakob 1:22 Ka Bible ka la kren shai 
Ba nga bad phi ,Ngim dei ban long tang ki Nongsngew hynrei ngi dei ruh ban long ki Nongleh
Ka Jingkylli ka mih mynta Balei ngi long kumne?
Balei ha kine ki sngi,Ngi long tang ki Nongsngew ym ki Nongleh ia ka ktien?
Ka Jubab ka long ba ngi ,ngim don shuh ka Por ba ngin ngam jylliew ia ka Ktien U Blei  ha ka Por ba ngi pule ia ka
Kaei mo kaba pynlong ia ngi kumne?
Ka Jubab ka long ba bun na ngi,Ngi pyllut ia ka Por ha ki kam sngewbha jong kane ka Pyrthei 
Ngi lah ban peit Film 2 kynta 
Ngi lah ban lehkai games 2 kynta
Ngi lah ban sngap Jingrwai 2 kynta
Hynrei  da ngi Pule Bible  shiteng kynta ngi la thait
Ngi im ha ki sngi kiba eh bha Paralok baieit, U Soitan u pynthame ia ngi ha kiba bun ki liang bad nga bad Phi ngi dei ban long kiba husiar bha
Ngi dei ban long noh kiba smat  ban Pule Bible ban duwai 
Namar Ka Por ka ladei ba nga bad phi  ban long noh ki Nongleh ia ka Ktien ym shuh tang ki Nongsngew
Shithi ki Hebru 4:12 "Namar ka ktien U Blei  ka long kaba im,bad kaba don bor,bad kaba kham nep ban ia kano kano ka waitlam arliang syrti,bad  kaba pei haduh kaba pynkhlad ia ka Mynsiem,ia ki mat bad ia ka khlein shyieng ruh,bad  kaba bishar ia ki jingmut bad  ia ki jingthmu ka dohnud"
Ka Ktien U Blei ka long kaba donbor kaba im
Bunsien ha ka Jingim Jong ngi,U Bymman Pynshoi ia ngi ha kiba bun rukom 
Hynrei ngi dei ban tip ba ngi lah ban jop ia ki Jingpynshoi U Bymman da ka Ktien U Blei 
Namar ka ktien U Blei ka long kaba im,kaba donbor,bad kaba kham nep ban ia kano kano ka waitlam arliang syrti....."(Hebru 4:12)
Ha ka Gospel U Mathaios  lynnong 4 la thoh ba U Soitan U Pynshoi ia U Jisu lai sien
Bad U Jisu Haba U Soitan U Pynshoi ia U,
U Jisu U Quote ia ki Dhkot Bible  ba la thoh 
U Jisu U la pyni ia ngi ka Lad,kumno ngin jop ia ki Jingpynshoi dei da ka ktien U Blei 
Ha ka Por ba U Soitan U Pynshoi ia U Jisu 
Ba u ong "........Lada me long U Khun U Blei,to hukum ia kine ki maw ba kin long ki Kpu"(Mathaios 4:3)
Hynrei U Jisu  U la ong
"......La thoh : Bym tang da U Kpu hi ba un im U briew,hynrei da ki ktien baroh ba mih noh na ka Shyntur U Blei "(Mathaios 4:4)
Te Paralok baieit jong nga lada  nga bad phi,ngim long ki Nongleh ia ka Ktien te kumno ngin jop ia ki Jingpynshoi U Bymman
Hynrei lada nga bad phi ngi long ki Nongleh ia ka ktien Ngin jop ia ki Jingpynshoi U Bymman 
To ngin pule 2 Timothi 3:16-17 "Ka Jingthoh baroh ka long kaba la pyrsad mynsiem da U Blei, bad kaba myntoi ia ka Jinghikai,ia ka jingsneng,ia ka jingpynbeit,ia ka jingpynmlien kaba hok;khnang ba U briew jong U Blei un ioh long janai,haba la pyndap biang ia u sha ka Jingleh babha baroh"
Ka Bible ka long kaba donkam tam ha Ka Jingim U briew
Namar kan myntoi aiu ia nga bad phi,lada ngi ioh shibun ki Jingbam babang, hynrei ia ka Jingbam ba kynja Mynsiem ngim ai ia ka Mynsiem
Namar Ka Jingbam ba kynja Mynsiem kadei ka Jingbam ba donkam tam ha ka Jingim U Briew bad kata kadei ka Ktien U Blei  Ka Bible
Ioannis 6:63 "Ka long ka Mynsiem kaba pynim,ka doh kam pynmyntoi ei ei ruh em,kita ki ktien kiba nga la kren ha phi ki long ka Mynsiem,bad ki long ka Jingim"
Paralok baieit  jong nga,Haba ngi la pule bad ngi ia Puson lang ki Dhkot Bible  katto ngi la iohi ba Ka Ktien U Blei ka long ka Jingim ia ngi
Bad ngi dei ban im katkum ka Ktien U Blei 
To ngin pule Kolossai 3:16-17 "
Ai ba ka ktien U Khrist,kan shong kyrhai hapoh jong phi ha ka Jingstad baroh; da kaba hikai bad da kaba iasneng Paralok ha ki Salm,ha ki Jingrwai  bad ha ki jingkynud bakynja mynsiem,da kaba rwai da ka Jingaiei ha ki dohnud jong phi sha U Blei. Te Kaei kaei baroh kaba phi leh  ha ka ktien lane ha ka jingleh,to leh ia baroh,ha ka Kyrteng U Jisu uba U Trai da kaba ainguh ia U Blei uba Kpa da U"
Paralok baieit  to iit noh ialade phi long ki Nongsngew bad ki Nongleh ia ka Ktien
Ne phi long tang ki Nongsngew  ym ki Nongleh
Ngi dei ban tip shai Hebru 13:8 "U Jisu Khrist  u long ujuh mynhynnin,bad mynta bad sha bymjukut "
Hynrei nga phi ngi dei ban kylla 
Nga bad phi ngi dei ban kylla bamut Nga bad Phi ngi dei ban iehnoh ki jingleh Bymman baroh nga bad Phi ngi dei ban Pdiang noh ia U Jisu Khrist ha ka Jingim jong ngi
Haba nga peit ialade nga iohi ba nga dap da ka Pop bad ngam lah shuh ban iarap ialade ban pynim ialade hynrei haba nga pule
Loukas 19:10 "Naba U Khun U briew  U la wan ia kaban wad bad ban pynim ia kiba la jah noh"
Nga dap da ka Jingkyrmen namar U Jisu u la wan sha Pyrthei  ban pynim ia U Nongpop ba la jah kum ma nga
Namar Da Ka Jingiaei U Blei la pynim ia nga
Kam Ki Apostol 3:19 "Namar kata to kylla kaba mut,to wan phai Khmat ruh,ban ioh pyndam noh ia ki Pop jong phi,ba kumta kin ioh wan ki aiom shong pyngngad na khmat U Trai"
Paralok baieit  Lada U Mynsiem Bakhuid,U Kren ia phi to Wan noh mynta ban Pdiang noh ia U Jisu Khrist ha ka Jingim jong phi
Wan noh mynta sha ka Kjat ka Diengphna
Wan noh mynta ban Pdiang noh ia U Jisu kum U Trai bad U Nongpynim jong phi
Bad haba phi la Pdiang ia U Jisu Khrist kum U Trai bad U Nongpynim jong phi,Ka Jingim Jong phi kan sa dap da ka Jingkmen,Jingsuk
Bad phin sa long ym shuh tang ki Nongsngew ia ka ktien hynrei phin long ruh ki Nongleh ia ka ktien
Phin sa long kiba smat ban Pule ia ka ktien U Blei  phin sa long kiba smat ban Duwai
Bad naduh mynta phin sa tip ba phin ioh ka Jingim bymjukut
Ngan Pynkut da kine ki Quotes 
U (L) Rev D.R. Billy Graham  u ong "Nothing can calm our souls more or better prepare us for life's challenges  than time spent alone with God"
U C.S.Lewis u ong "Don't shine so others can see you,Shine so others through you, can see him"

To ngin ia duwai,Ah Blei  nga ainguh ia me ba ai ia ngi kane ka lad ba ngin pule ba ngin Puson lang ia ka Ktien bakhuid ka Jong me lyngba kane ka khubor, Kyrkhu Ah Blei  ia baroh kiba pule ia kane ka Khubor, Pynsleh ia ngi Ah Blei  da U Mynsiem bakhuid, Pynthymmai Ah Blei  ia ka Jingim jong ngi baroh, Map ia ki Pop jong ngi, Sait ia ngi da ka Snam U Khun jong me U Jisu ba ngin lieh kum ka ior, Thoh noh Ah Blei  ia ka Kyrteng jong ngi ha ka Kitab ka Jingim,Naba ia kine baroh nga duwai ha ka kyrteng ba thiang tam bad ba donbor tam jong U Trai bad U Nongpynim jong ngi,U Jisu Khrist "Amen "

Na ka bynta ka burom U Blei "Amen"

U Blei un kyrkhu ia phi 









Comments

  • No Comments
Log Out?

Are you sure you want to log out?