"Hato Kadei Mo Ban Don Ka Jingialok Bad Ka Pyrthei?" (Is It Right To Have Friendship With The World?) Read Count : 693

Category : Notes/work

Sub Category : N/A
Nga Pdiang sngewbha ia phi baroh kiba pule ia Kane ka Khubor na Kane ka Website ha ka Kyrteng U Trai bad U Nongpynim jong ngi,U Jisu Khrist.

Shuwa,ba ngin iaid shakhmat to ngin ia duwai,Ah Blei ngi ainguh ia me ba me la ai ia ngi Kane ka lad ba ngin ioh ban sngap ia ka Khubor na ka ktien ka Bakhuid ka jong me,Plie ia ki Jingkhangiit Ka bneng, Kren ha ngi Trai,Pynsleh ia nga da U Mynsiem Bakhuid, ai ba kaei kaei kaba ngan thoh kan long katkum ka jingialam U Mynsiem Bakhuid, Shimti Trai ia Kane ka Por naduh dang sdang haduh bakut ha ka Kyrteng U Jisu Khrist, U Trai bad U Nongpynim jong ngi,ngi duwai "Amen".

Paralok baieit, ha Kane ka Por,nga kwah ba ngin iapuson lang shaphang kawei Ka Phang kaba la shon bha ha ka dohnud ka Jingmut Jingpyrkhat jong nga," Hato kadei mo ban don ka Jingialok bad Ka Pyrthei?"(Is it right to have frienship with the World?) ba la pynshongnongrim na  U Jakob 4:4 bad Shithi ba nyngkong U Ioannis Uba U Apostol 2:15 -17
Ki ktien ba ong kumne "Phi kiba klim,hato phim tip ba kata ka Jingialok bad ka Pyrthei ka long ka jingshun ia U Blei? namar kata uno uno ruh uba mon ban long U lok bad ka Pyrthei, u pynlong ia lade ban shun ia U Blei kein."
"Phi wat ieit ia ka Pyrthei, lymne ia kita kiei kiei ruh kiba ha kata ka pyrthei.Lada uno uno ruh u ieit ia ka Pyrthei, kata ka Jingieit U Kpa kam don shuh ha U,Naba baroh kaba ha kata ka pyrthei, ka jingkwah brai jong ka doh,bad ka jingkwah brai jong ki khmat bad ka Jingsarong thala shaphang ka Jingim, kam long na U Kpa,hynrei na kata ka Pyrthei ka long,Bad kata ka Pyrthei ka iaid jah noh,bad kata ka Jingkwah brai jong ka:hynrei uta uba leh ia ka mon U Blei U iaisah bymjukut"

Paralok baieit,Ngi im ha ki sngi,ba ngi iohi bun ki jingjia ba shyrkhei ki jia ha ka Pyrthei,Ka thma U Syiem Jingdum ruh ka Rhem bha mynta
Ki briew ki la ngop ha kiba bun jait ki jingsniew
Ki peit ia kiei kiei ha Internet,kiba lah ban pynjot ia ka jingim U Briew
Ki dih ia ki jingdih buaid,ki drugs,ki bam ia ki jingbam kiba pynjot ia ka met
Ki pynsngewbha ia ka Jingkwah brai ka doh hynrei to ngin peit kumno 
1 Korinth 10:31 ka ong "Namar kata lada phi bam ne lada phi dih,ne lada phi leh ei ei ruh,to leh phi ia kiei kiei ia kaban pyndonburom ia U Blei"
Bun na ngi, ngi ong ba ngi tip ia U Blei hynrei ha ki kam ngi Len ia U
Titos 1:16 "Ki  phla ba ki tip ia U Blei;hynrei ha la ki kam ki Len ia U,bad ki long kiba ijli,bad kibym konhnguh, bad ki jingleh babha baroh kibym suid ñiew"
Paralok baieit, ngi dei ban tip ba lada ngi ngeit ha U Jisu Khrist, ngi dei ban kynmmaw ba ha ki kam jong ngi,ruh ngi dei ban leh kiei kiei kiba pynsngewbha ia U Blei
To ngin pule 1 Petros 5:8 "To phin leh adkar,to phin iasharai; naba uta u nongialeh jong phi uba U Soitan,kum u Sing bakyrhuh u iaid kylleng,u da wad khnang ia uno uno ruh ba un ioh nguid tylli"
Paralok baieit ngi dei ban long kiba smat ban Pule ia ka ktien U Blei bad ban duwai ba ngin jop ia ki Buit thap U Soitan
"When Satan Strikes You, Strike him back with the Word of God"
To ngin pule
Galatia 6:7 "Wat shah ba yn shukor ia phi,yn ym shukor ia U Blei:namar ia kaei kaei ruh ba U Briew u bet,ia kata un ioh ot ruh"
Paralok baieit,baroh U Briew udei u nongbet bad u nongot
Lada Nga bad phi,ngi bet ia U Soh jong ka jingkwah brai ka doh,ngi leh ia kiei kiei ki jingsngewbha pyrthei, ha kawei ka Sngi ngin sa ioh ot ia U Soh jong ka jingkwah brai,hynrei lada nga bad phi, ngi bet ia U Soh jong kiei kiei kiba ngi pynsngewbha ia U Blei bad leh ka Mon jong U Blei,ngin sa ioh ban ot ia U Soh jong kaei kaei kaba ngi pynsngewbha ia U Blei
Namar kaei kaei kaba U Briew u bet ia kata Un Ot
Galatia 6:8 "Naba uta uba bet,ia ka doh jong U hi,na kata ka doh un ioh ot ia kaba pyut:hynrei uta uba bet ha U Mynsiem,na uta U Mynsiem un ioh ot ia ka jingim bymjukut"
Ngi dei ban kynmmaw Paralok ba kaei kaei ka Pop ba ngi leh kan sa lap ia ngi
Ki Jingkhein 32:23 "Hynrei lada phin ym leh kumne ha khmih, phi leh pop ia U Trai:bad to tip shkem ruh ba ka Pop jong phi kan sa lap ia phi"
Paralok baieit, ngi dei ban iit noh ialade,Kane kam dei shuh ka Por ba nga bad phi, ngin beh ia ki Jingkwah brai ka doh,ia ki Jingsngewbha Pyrthei, namar kine baroh ki long na ka Pyrthei ym na U Blei bad ngim dei ban long U lok Ka Pyrthei bad ban ieit ia Ka Pyrthei 
Namar Lada ngi ieit ia ka Pyrthei ka Jingieit U Kpa kam don shuh ha ngi(1 Ioannis 2:15)
Bad lada ngi long U lok ka Pyrthei, ngi pynlong ialade uba shun ia U Blei kein(Jakob 4:4)
Namar baroh kaba ha kata ka Pyrthei, ka jingkwah brai jong ka doh,bad ka jingkwah brai jong ki khmat,bad ka Jingsarong thala shaphang ka Jingim kam long na U Kpa hynrei na kata ka Pyrthei ka long (1Ioannis 2:16)
Paralok baieit, Kane ka ladei ka Por ba ngin kyndit bynriew 
Kane ka la dei ka Por ba ngin kylli ia lade hato nga ieit ia Ka Pyrthei ne ia U Blei
Jied phi ha Kane ka Sngi iano phin shakri
Ia Ki Jingsngewbha Pyrthei, ia ka Spah Pyrthei 
Lane ia U Jisu Khrist uba la aiti ia la ka Jingim na bynta jong nga bad jong phi, ba ngin ioh ka Jingim bymjukut
To ngin pule ROM 6:23 "Namar ka bainong ka pop ka long ka Jingiap ;Hynrei ka jingaiei ka jong U Blei ka long ka Jingim bymjukut da U Khrist Jisu uba U Trai jong ngi"
Paralok baieit ngi iohi ba ka ktien U Blei Ka ong ba ka bainong jong ka Pop ka long ka Jingiap, hynrei ka Jingaiei Ka jong U Blei ka long ka Jingim bymjukut da U Khrist Jisu uba U Trai jong ngi 
Paralok baieit, ngi dei ban kynmmaw ba the Call for Repentance ne ka Jingkhot sha ka Jingkylla ka bamut ka dei ia baroh
2 Petros 3:9 "U Trai um leh tud shaphang la ka jingkular ,kumba don kiba iañiew ka jinglehtud:hynrei u iaishah slem bad phi, ubym mon iano iano ruh ban jot noh,hynrei ba baroh kin poi sha ka Jingkylla kaba mut"
Paralok namar kan myntoi aiu ia ngi da ngi long kiba riewspah,ne kiba pawnam lada ngim kylla kaba mut
Markos 8:36 "Naba U Briew un myntoi aiu,lada un ioh ia ka Pyrthei baroh bad un duh noh ia ka mynsiem?"
Ka Mynsiem jong ngi,kan im shirta ,te ngi dei ban kylla kaba mut ba ngin Pdiang noh Ia U Jisu Khrist kum U Trai bad U Nongpynim jong ngi,khnang ba ngin ioh ia ka Jingim bymjukut 
Paralok baieit,lada baroh shi katta, nga bad phi lah ngi la ieit ia ka Pyrthei ,nga bad phi ngi la lah long ki Lok Ka Pyrthei,kane ka la dei ka Por ba ngin ieh noh ia ka Jingkwah Brai ka doh ba ngin kylla kaba mut noh
1 Ioannis 1:9 "Lada ngi phla ia ki Pop jong ngi,u long uba iaineh bad uba hok,ban map noh ia kita ki Pop jong ngi bad ban pynkhuid ia ngi na kabym hok baroh"
Paralok baieit,lada nga bad phi ngi la Pdiang ia U Jisu Khrist ngi dei ban kynmmaw
ROM 8:10 "Bad lada U Khrist U don hapoh jong phi,kata ka met ka long kaba iap namar ka pop:hynrei kata ka mynsiem ka long ka jingim namar ka hok"
Paralok baieit,ki jingpynshoi bunsien ki wan leh donbor ia ngi,hynrei ngi dei ban tip ba ngi lah ban jop ia ki Jingpynshoi
Jakob 4:7 "Namar kata to da pynkohnguh ialade ha U Blei:hynrei to ialeh pyrshah ia U Soitan te un phet iap noh na phi"
Paralok baieit lada ngi pynkohnguh ialade ha U Blei ,ngi smat ban pule ia ka ktien U Blei bad ban duwai
U Soitan un phet iap na ngi bad un nym lah ban leh donbor ia ngi
EPHESOS 6:11 "To kieng noh ia ka jingkieng atiar ka jong U Blei baroh ba phi lah  ban ieng pyrshah ia ki Buit thap U Soitan"
Paralok baieit kane ka la dei ka Por ba nga bad phi ngin kieng noh ia ka Jingkieng Atiar ka jong U Blei,ba ngin jop ia baroh ki Buit thap U Soitan
Paralok baieit,ngi dei ban kynmmaw uta uba jop ia ki jingkwah Brai ka doh,ki khmat U dei uta uba ngeit ha U Jisu Khrist
1 Ioannis 5:5 "Uei uta uba jop noh thiaw ia kata ka Pyrthei,tang uta kein uba ngeit ba U Jisu U long U Khun U Blei"
Paralok baieit,Nga tip bun na phi,Phi sngewsih,Phi duh Jingkyrmen,Phi sngew bym don ba ieit ia phi,phi sngew bym don jingmap shuh ia phi 
Hynrei Paralok baieit,Lada Phi wan sha Ka Kjat ka diengphna Phi Pdiang noh ia U Jisu Khrist kum U Trai bad U Nongpynim jong phi,phin sa shem ia Ka Jingieit,Jingsuk,Jingkmen, Jingmap kaba sngewtynnad haduh katta katta
U Ravi Zacharias U ong"We live with the hunger for truth,love,justice and forgiveness. There is only one place in the World Where these Hungers Converge:it is in the Cross of Christ, where perfect love and Perfect Justice became united in one death on a Friday Afternoon "
Paralok baieit, ngi dei ban kynmmaw ruh ba U Jisu U la wan ba ngin ioh ka Jingim ba ngin ioh kyrhai ia ka ruh(Ioannis 10:10)
Paralok baieit nga tip bun na phi kiba pule ia Kane Ka Khubor, phi kwah ban ieh noh ia ki Jingsngewbha Pyrthei, phim kwah shuh ban long Ki Lok Ka Pyrthei Hynrei Phi kwah ba Phin ai noh ka Jingim sha U Jisu Khrist bad nga tip phi kwah ban don noh ka relationship bad U Jisu, Paralok baieit Lada U Mynsiem Bakhuid U la kren ha phi,Nga ong ia phi ha Kane Ka Por Wan sha ka kjat ka Diengphna Wan ban Pdiang noh ia U Jisu Khrist kum U Trai bad U Nongpynim jong phi,U Jisu un sa Map ia ki Pop ki jong phi,Phin sa long kiba la Born again bad phin sa ioh ka Jingim bymjukut 
Naduh mynta U Jisu un sa long U Trai jong ki Khmat ki jong phi, U Trai jong ki Shkor ki jong phi,U Trai jong ki Kti ki Jong phi,U Trai jong Ki Kjat ki Jong Phi,U Trai Jong ka Shyntur Jong Phi,U Trai jong Ki Jingmut Jingpyrkhat jong phi,U Trai jong ka iing ka sem jong Phi 
Namar ngi dei ban kynmmaw Ioannis 8:12 "Ynda kumta U Jisu u la iathuhkhana Pat ha ki,u da ong,Nga long U Jingshai jong ka Pyrthei :uta uba wan bud ia nga un ym iaid ha kaba dum hynrei un ioh ka Jingshai jong ka Jingim"
2 Korinth 5:17 Kumta lada uei uei ruh u don ha U Khrist,u long U Jingthaw bathymmai kiei kiei ruh kiba rim ki la duh noh, ha khmih kiei kiei baroh ki la jia long kiba thymmai "
Paralok baieit, ngan pynkut da Kane ka Quote Jong U Ravi Zacharias "When your life is Changed by Jesus,you are a new creature,God not only Changes what you do,He also Changes what you want to do"
Na Ka Bynta Ka Burom U Blei "Amen"

To ngin ia duwai Ah Blei,ngi ainguh ia me ba me la ai ia ngi Kane ka Khubor na ka ktien ka Bakhuid ka jong me,Kyrkhu Ah Blei ia baroh kiba Pule ia Kane Ka Khubor, Ah Blei bunsien ngi la pynsngewsih ia me,Ngi la leh Pop,Ah Blei to sait noh ia ngi, da ka Snam U Khun Jong Me,U Jisu Khrist, ia ngi ba ngin lieh kum ka ior,Trai Jisu wan ha dohnud ha Jingim Jong ngi,Pynkhuid ia ka dohnud ka Jingmut Jingpyrkhat jong ngi,Thaw thymmai Trai ia ka Jingim Jong ngi,Pynsleh ia ngi da U Mynsiem Bakhuid, ai ba naduh Mynta U Mynsiem Bakhuid un ialam ia ka Jingim jong ngi,Thoh ia ka Kyrteng Jong ngi,ha ka kitab Ka Jingim, Ha Ka Kyrteng U Jisu Khrist U Trai bad U Nongpynim Jong ngi, nga duwai "Amen"

U Blei un  kyrkhu ia phi baroh kiba Pule ia Kane Ka Khubor 😇😇😇😇



Comments

  • Jun 28, 2020

Log Out?

Are you sure you want to log out?