Kiei Kiei Kiba Ngi Ki Khun Samla Ngi Dei Ban Tip. Read Count : 67

Category : Notes/work

Sub Category : N/A
Nga Pdiang Sngewbha ia phi baroh sha kane ka Jingiasyllok balyngkot na ka ktien U Blei ha ka Kyrteng U Trai bad U Nongpynim jong ngi U Jisu Khrist.

Shuwa ban iaid Shakhmat,to ngin ia duwai "A Blei ngi ainguh ia me,ba me ai ia ngi kane ka por,ba ngin ia puson lang na ka ktien jong me ha kane ka Website,Plie ia ki Jingkhangiit ka bneng,Kren ha ngi Trai ha kane ka por,Ai ba U Mynsiem bakhuid un ialam ia ngi naduh dang sdang haduh kaba kut kane ka Jingiasyllok.Ha Ka kyrteng U Jisu Khrist U Trai bad U Nongpynim jong ngi,ngi duwai "Amen"

Ngan pule na ka Shithi kaba nyngkong U Paul  U Apostol sha U Timothi 4:12
Ki ktien ba ong kumne "To wat ai iano iano ruh,ban ibeiñ ia ka jinglong Samla jong me;hynrei to men long ka rukom ia kita kiba ngeit,ha ka ktien,ha ka jinglong jingim, ha ka jingieit,ha ka jingngeit,ha ka jinglong sngur"
Hadien ba pule ia Kane dhkot ngi iohi hangne ba U Apostol Paul U ong ia U Timothi ba ym dei ban ai iano iano ruh ban ibeiñ ia ka jinglong Samla jong U hynrei U dei ban long ka rukom kaba mut U dei ban set ka example ia kiba ngeit,Kane ka thew ruh ia ka Jinglong Samla jong nga jong phi
Kaba nyngkong U Apostol Paul u ong lyngba ka ktien 
Ka mut aiu mo lyngba ka ktien ban set example ia kiba ngeit?
Kane ka mut haba ngi iakren bad no bad no ngim ju dei ban kren da ki ktien ba pynmong iano iano hynrei da ki ktien ba pynsngewbha ia ki,kiba pynsngewbha ia U Blei
 Shithi U Paul U Apostol sha ki Nong Ephesos 4:29 "Wat ai ba kano kano ka ktien sih kan mih na ka shyntur jong phi,hynrei tang kata kaba bit ia kaban tei ia Kaba donkam, ban ai ka jingaiei ia kita kiba iohsngew"
Bad Mathaios 12:37 "Naba na ki ktien jong me yn pynksan ia me,bad na ki ktien jong me yn pynrem ia me"
Kaba ar U Apostol Paul u ong lyngba ka Jinglong Jingim
Ka mut aiu mo lyngba ka jinglong Jingim ban set example ia kiba ngeit?
Kane ka mut ba kiwei ki lah ban iohi ia ka Jingbhabriew U Jisu lyngba ka Jingim Jong ngi kumban Smat ban Pule Bible bad Duwai,kumban beh brai ia ka hok,ia ka jingriewblei,kumban long kiba jemnud,kiba iaishah,bad  kumjuh ruh ban burom ia ki kmie ki Kpa,bad kumjuh ruh ban konhnguh ia ka Jingsneng jong ki
Kumba la thoh Mathaios 5:14 "Phi phi long ka Jingshai ka Pyrthei, Ym lah ban buhrieh ia ka shnong ia kaba la buh halor um"
To ngin long ka Jingshai lyngba ka Jingim jong ngi
Kaba lai U Apostol Paul u ong lyngba ka Jingieit 
Ka mut aiu mo lyngba ka Jingieit ban set example ia kiba ngeit?
Kane ka mut ba ha ka Jingim jong ngi,ngi baroh ngi dei ban don ka Jingieit Kaba nyngkong kadei ba ngin ieit ia U Blei da ka dohnud ka Mynsiem baroh namar lada ngim ieit ia U Blei, ngim lah ban ieit ia lade,ne ban ieit ia kiwei namar U Blei long ka Jingieit.
Ngi dei ruh ban ieit ia ki Nongshun kumba U Jisu u la hikai ia ngi
Mathaios 5:43-44 "Phi la iohsngew ba la ong,Men ieit ia la u paramarjan,men shun ruh ia uba shun ia me.Hynrei nga ong ha phi,To ieit ia ki Nongshun jong phi, bad to kyrkhu ia kiba tim ia phi,to lehbha ia kiba shun ia phi,to duwai ruh na ka bynta kiba leh sniew ia phi,bad leh beiñ ruh ia phi"
Shithi ba nyngkong U Ioannis uba U Apostol 4:7-8 "Ko hep baieit,to ngin iaieit paralok hi,naba Ka jingieit ka long na U Blei; te uwei pa uwei baroh uba ieit,la Kha ia u na U Blei, bad u ithuh ia U Blei, Uta ubym ieit um ithuh ia U Blei, naba U Blei u long ka Jingieit"
To ngin ia ieit ia U Blei ngin iaieit paralok,khnang ba baroh kin iohi ia ka Jingbhabriew U Jisu lyngba Ka Jinglong Samla jong ngi
Kaba saw U Apostol Paul u ong lyngba ka Jingngeit
Ha kano ka rukom mo lyngba ka jingngeit ban set example ia kiba ngeit?
Kane ka mut ba lyngba ka Jingngeit jong ngi ha U Jisu Khrist ngin lah ban set example ia kiba ngeit
Shithi U Paul U Apostol sha U Timothi 1:5 "Hynrei ka jingthmu ka jong kata ka hukum ka long ka jingieit na ka dohnud bakhuid bad ka jingiatiplem babha bad ka jingngeit bakhlem arsap"
Bad ngi dei ruh ban kynmmaw ba
Khlem ka Jingngeit ngim lah ban pynsngewbha ia U (Hebru 11:6)
To ngin long ki Khun kiba ngeit ha U Jisu Khrist khnang ba ngi ngin lah ban set example ia kiba ngeit baroh
Kaba San bad kaba khatduh kaba U Apostol Paul u ong ha Kane ka dhkot kadei lyngba ka jinglong sngur
Ha kano rukom mo lyngba ka Jinglong Sngur jong ngi ban set example ia kiba ngeit?
Kaba long Sngur kaba mut ba ka Jinglong Samla jong ngi,kadei ban long kaba Sngur Kaba khuid khnang ba ngin lah ban set example ia kiba ngeit
Kumban ngin long kiba pyndonkam ki Sap kiba U Blei u ai ia ngi,na bynta jong U
Kumba ngin long kiba kloi ban kit ka kam U Blei bad kumta ter ter
Jingrwai Sngewsynei 3:27 "Kaba bha ia u briew ba un kit ia ka lyngkor haba u dang Samla"
Hadien ba ngi pule ia kane,ngi iohi ba Kum Ki Khun Samla ngi don ka kamram kaba ngi dei ban leh,bad ngim ju dei ban long kiba lehrain hynrei to ngin leh kine kine kiei kiei baroh ban pyndonburom ia U Blei
Ngan pynkut ia kane ka Jingiasyllok balyngkot da kane ka dhkot
Shithi ba ar U Paul U Apostol sha U Timothi 2:22 "Hynrei to phet iap noh na ki jingkwah Brai ka jinglong Samla;bad to beh  brai ia ka hok,ia ka jingngeit,ia ka jingieit,ia ka jingsuk, lem bad kita kiba khot kyrpad ia U Trai na ka dohnud bakhuid"
Na ka bynta ka burom U Blei "Amen"

To ngin ia duwai, A Blei,ngi ainguh ia me,ba me ai ia ngi kane ka khubor na ka ktien bakhuid ka jong me,Ngi tip A Blei,ba kum Ki Khun Samla ngi don ka kamram kaba khraw ba ngi dei ban leh,Ai bor Trai ia ngi ba ngin lah ban pyndep ia baroh kine,Pynsleh ia ngi da U Mynsiem bakhuid,Thaw Thymmai Trai ia ngi,Map noh ia baroh ki Pop jong ngi,Ha Ka Kyrteng  U Jisu Khrist U Trai bad U Nongpynim jong ngi,ngi duwai "Amen"

U Blei un kyrkhu ia Phi 😇😇😇

Comments

  • No Comments
Log Out?

Are you sure you want to log out?