Category : Notes/work

Sub Category : N/A

Ha kane ka por nga kwah ban iasyllok na ka Ktien U Blei kaba ngi lah ban shem na ka shithi U Paul sha ki Hebru 9:27.

"Te kumba la buh ha ki briew ban iap tang shisien,bad hadien kane ka wan ka jingbishar"

Ha shwa ngin iaid shaphrang to ngin ia duwai.
    "Ko Kpa jong ngi Uba ha bneng ngi ainguh ia Me ha kane ka por ba Me ai ia ngi ia kane ka ktien ka jong Me.To isynei ban pyndap ia ngi da U Mynsiem khamtam ia nga uba dei ban iasam na ka ktien jong Me bad to ai ba kane ka ktien ka jong Me bad ka khubor jong ka kan iarap bad kan long ka jingkyrkhu ia ngi iwei pa iwei baroh.Ha ka kyrteng U Jisu Khrist.Amen.

Ia kane ka bynta bad ka dkhot jong ka Ktien U Blei nga kwah ban phiah ha ki san bynta.
Khyndiat hangne phi lah kylli Kaei ka jingiap bad balei ba ka don?
Ka jingiap ka dei ka bainong kaba U Blei hi u la buh namar ki pop bad ki jingleh palat jong u briew. (Rom 6:23)

1.) "La  buh..." --Ka jingiap ka dei kata kaba ngim lah ban kiar.
Hangne ngi sngewthuh shai bha ba ia ka jingiap ngim lah ban kiar; kaba mut ka long kaba tikna hynrei bun na ngi ngi im man la ka sngi kumba ngin im sah.Ngi lah ban control ia ka jingkha briew hynrei ngim lah ban control ia ka jingiap. U Buddha u ba dei u blei jong ki Buddhist shisien u ong, "Ka jingim ka long kabym tikna hynrei ka jingiap ka long kaba tikna."

2) "ha ki briew..." --kaba mut kynthup lang maphi bad ma nga bad ia ngi iwei pa iwei baroh ngim lah lait.
Hangne ki briew ka mut ia ki briew baroh kynthei bad shynrang.Ha ka history jong ki briew ka Bible ka iathuh ba don tang arngut kiba lait na ka jingiap U Enoch(Genesis 5:24-25) bad U Elijah(2Kings 2:1,11).

3) "...iap tang shisien..." --kaba mut ngi iap tang shisien ha kane ka doh.Hadien ba ngi la iap ym don shuh ka lad ban im biang sa shisien.Ka jingiap ka jia tang shisien.

4) "...bad hadien kane..." --kane ka mut ba ka jingiap kam pat dei kaba kut jong u briew.Katkum ka jingong jong ki briew kiba bun ki shait ong ba "Ka jingiap ka dei kaba kut eh jong ka jingim bad ym don ei ei shuh nalor kata".Hynrei ka Bible ka iathuh ia ngi ba ka jingiap ka long tang kum ka ''jingiohthiah" ba shipor.(John 11:11).

5) "...ka jingbishar..." --Kane ka mut ba ka jingiap ka dei ka jingkhang jong ka jingim bymjukut jong ngi iwei pa iwei.Ym don shuh ka lad ba ngin dang long biang kumjuh lane ban im biang hadien ka jingiap hynrei ka Bible ka iathuh ia ngi ba kan wan noh ka jingbishar.Ka Bible ka iathuh ba U Jisu Khrist U long U Nongbishar bad Un ainong ia ki briew baroh katkum ki jingleh jong ngi iwei pa iwei baroh la bha ne sniew.
 Nga ngeit ba kane ka khubor ha kane ka por kan iarap ia ngi ba ngin puson ialade bad ba ngin ït ialade, Hato kaei kaba ngi la leh na ka bynta U Khrist? Ai ba ka jingim kaba ngi don kan long na ka bynta U Blei bad ka burom jong U.Tang ine i khubor ba khyndiat,Na ka bynta ka burom U Blei.Amen