"U Nongpynkhiah Ba Khraw Tam" Read Count : 57

Category : Notes/work

Sub Category : N/A
Nga pdiang sngewbha ia phi baroh ha ka kyrteng U Trai bad U Nongpynim jong ngi U Jisu Khrist.

Shuwa ba ngin iaid shakhmat to ngin ia duwai Trai Jisu,ngi wan ban dem ha ki sla jat ki bakhuid ki jong me,ban ainguh ia me Trai ba me ai ia ngi Kane ka lad ban sngap ia ka khubor na ka ktien bakhuid ka jong me ha Kane ka Website,Kren ha ngi Trai ha Kane ka por,Ai ba U Mynsiem bakhuid un ialam ia ngi naduh dang sdang haduh ka bakut.Ha Ka Kyrteng U Jisu Khrist U Trai bad U Nongpynim jong ngi, ngi duwai "Amen"

Ha Kane ka Sngi nga kwah ban iapuson lang shaphang kawei ka phang,kaba shon bha ha ka dohnud ka Jingmut Jingpyrkhat jong nga "U Nongpynkhiah ba khraw tam"
Ia kaba la pynshongnongrim na ka ktien bakhuid ka jong U Blei ba ngi lah ban Shem 
 Na Ka Gospel U Mathaios 8:1-4(U Jisu U Pynkhiah ia uba pang ñangthohlieh)
Ki don shibun ki kambah ba U Jisu U leh,hynrei ha kane ka sngi ngin iapuson lang shaphang kane kawei ka Jingiathuhkhana.

Paralok baieit shah ia nga ban ngan nym thoh shuh ia kane ka jingiatuhkhana hangne hynrei shuwa ba phin iaid sha khmat sngewbha pule ia kane ka jingiatuhkhana.

Paralok baieit, Ha ka por ba U Jisu, u la wan hiar na u lum,ki paidbah babun Ki la iabud ia u.Ha khmih ruh, uba pang ñiangthohlieh u la wan,bad u la mane dem ia u,u da ong Ko kynrad lada,me Mon,me lah ban pynkhuid ia nga.U Jisu te u la kner ia la ki kti bad u la ktah ia uta u briew uba pang ñiangthohlieh,bad U Jisu u la ong to men long khuid,te kumta uta uba pang ñiangthohlieh u la khuid na kata ka jingpang jong u.
Te Paralok baieit hangne ngi iohi ba une u briew u don ka jingngeit ba U Jisu u lah ban Pynkhiah ia U
Bad dei ka jingngeit jong U ha U Jisu ba u la khuid na kata ka jingpang ñiangthohlieh
Paralok baieit lada don napdeng jong phi kiba don hapdeng ki jingpang jingshitom lada phi don ka jingngeit kumba don une U briew phi ruh phin Shem ka jingpynkhiah
To ngin pule Mathaios 17:20 "U Jisu te u la iathuh ha ki,namar ka jingbymngeit jong phi:naba shisha nga ong ha phi, lada phi don ka jingngeit kaba kat iwei I symbai tyrso,phin ong ha une u lum,To leit noh nangne hangtai,te un leit noh kein,bad ym don kaei kaei ruh ia kaba phin ym lah leh"
Te Paralok baieit lada phi don ka Jingngeit ba  U Jisu un Pynkhiah ia phi,Shisha phin shem ka Jingpynkhiah
Wat lada kadei ka jingpang Kum ka last stage Cancer, ne kum Une U khniang jingpang ba shyrkhei U Covid-19
Ha kaba ki riewstad kim pat lah ban shem dawai ban sumar 
Hynrei to tip Paralok baieit ba don U Jisu uba lah ban pynkhiah 
Ki doctor ki lah ban ong ba  um don lad shuh ban sumar
Hynrei kynmmaw Paralok baieit ba "God is the best doctor and Prayer is the best Medicine"
To ngin pule Markos 10:27 "Haba U Jisu U la khmih shain te ha ki,u la ong,Ha ki briew kata kabym lah,hynrei ym ha U Blei:naba Kiei kiei baroh ki long kiba lah ha U Blei"
Te Paralok baieit,ngi iohi ba kaei kaba U Briew  um lah ka long kaba lah ha U Blei
Paralok baieit,ngim dei ban duh jingkyrmen 
Ngim dei ban tieng,hynrei ngi dei ban kynmmaw ba U Jisu U don ryngkat bad ngi
Bad yn ym iehnoh ia ngi Bad U long U Nongpynkhiah
Kum kaba uto uba pang niangthohlieh u khiah,Phi ruh Paralok baieit wat lada phi don ha kano kano ka jingpang phin khiah lada phi don ka jingngeit 
Namar khlem ka jingngeit ym lah ban pynsngewbha ia U (Hebru 11:6)
Kum kaba U Blei U la iohsngew ia ka Jingduwai U Hesekaiah uba don hapdeng ka jingpang ban ioh jingpynkhiah(Pule 2 Syiem 20:5)
Kumta U Blei ruh un iohsngew ia ka Jingduwai jong phi,bad phin shem ka jingpynkhiah kumba U Hesekaiah U ioh ka Jingpynkhiah
Paralok baieit don napdeng jong phi,kiba pang ka dohnud kibym don jingsuk,jingkmen tang ki jingeh suda bad phim tip phin leh kumno 
Ngan ong ia phi,Wan sha U Jisu 
To ngin pule Mathaios 11:28 "To wan ha nga,phi baroh kiba thait bad ba khia ka jingkit,te ngan pynjem ia phi"
Paralok baieit,wan sha U Jisu phin shem ka Jingpynkhiah ha ka dohnud jong phi bad phin shem ka Jingsuk,jingkmen
To ngin pule 147:3 "U shna ia kiba la pait dohnud,bad U spain ia ki jingmong jong ki"
Paralok baieit to ngin pule Jeremiah 30:17 "Naba ngan ai pat ka jingkoit jingkhiah ha me,bad ngan pynkhiah ia me na ki jingmong jong me,ong U Trai;namar ki la khot ia me uba la kyntait noh,ki ia ong,Ka long Ka Seion ia kabym don ba wad shuh"
Paralok baieit ngi iohi ba U Blei U lah ban pynkhiah ia ki jingpang baroh 
U Blei ruh u lah ban pynkhiah ia ka Pyrthei na kane ka Jingpang Khlam ka Covid-19
To Paralok baieit ngin ia phai noh na ki lynti bymman baroh,ngin kylla kaba mut noh,ngin duwai bad U Blei un sa iohsngew ka jingduwai jong ngi bad un pynkhiah ia ka Pyrthei baroh kawei
To ngin pule 2 Ki Khronikl 7:14 "lada ki briew jong nga,ia kiba la khot da ka kyrteng jong nga,kin pynrit ia lade,bad kin duwai,bad kin wad ia ka khmat jong nga,bad kin phai noh na ki lynti bymman jong ki;kumta te ngan sngew na bneng,bad ngan map ia ki pop jong ki,bad ngan Pynkhiah ia ka ri jong ki"
Paralok baieit lada U Mynsiem bakhuid U kren ia phi ha kane ka por
Wan sha ka kjat ka diengphna ha Kane ka por
Wan ban pdiang ia U Jisu Khrist kum U Trai bad U Nongpynim jong phi
Bad phin sa Shem tang ka Jingsuk, jingkmen ha ka jingim jong phi
Phin nym sngew marwei shuh wat hapdeng ka Jingpang Jingshitom ruh Phin tip ba U Nongpynkhiah ba khraw tam U don ryngkat bad phi 
Bad lada ka long ka Mon ka jong U Phin sa Shem ka Jingpynkhiah.

To ngin ia duwai,Nga kyrpad ba phin duwai lang kane ka Jingduwai,A Blei,nga ainguh ia me ba me ai ia nga kane ka lad ba ngan sngap ia kane ka khubor na ka ktien bakhuid ka jong me,lyngba kane ka Website,Nga ainguh ia me ba me ai ia nga sa kane kawei ka lad ban kylla kaba mut,Nga tip ba me ieit ia nga,bad dei ka Jingieit jong me ba me la phah ia U Khun jong me U Jisu Khrist ban wan iap halor ka diengphna na  bynta ki pop jong nga,bad nga ngeit ba ha ka sngi kaba lai U Jisu U jop ia ka jingiap bad mynta U im,Nga Pdiang ia U Jisu Khrist naduh mynta kum U Trai bad U Nongpynim jong nga,Wan ha dohnud jong nga,Wan ban pynkhuid ia ka dohnud ka jingmut jong pyrkhat jong nga,Sait da ka snam jong me Jisu ia ki pop jong nga,Lada ka long ka mon ka jong me,Pynkhiah noh ia ka Pyrthei,Thoh ia ka Kyrteng jong nga ha ka kitab ka Jingim.Ha Ka kyrteng U Jisu Khrist U Trai U Nongpynim jong ngi,ngi duwai "Amen"

U Blei un kyrkhu ia Phi kiba pule ia kane 😇😇😇

~Gideon Rymbai



Comments

  • No Comments
Log Out?

Are you sure you want to log out?