"U Blei Bad Ka Spah" Read Count : 85

Category : Notes/work

Sub Category : N/A
Nga Pdiang sngewbha ia phi baroh kiba pule ia kane ka khubor ha kyrteng U Trai bad U Nongpynim jong ngi U Jisu Khrist.

Shuwa ba ngin iaid shakmat to ngin duwai, Trai Jisu ngi wan ban dem ha ki sla jat ki bakhuid ki jong me ban ainguh ia me Trai ba ngi ioh kane ka lad ban sngap ia ka khubor na ka ktien ka jong me na kane ka website,kren ha ngi Trai ha kane ka por.Ngi duwai ha ka Kyrteng U Jisu Khrist "Amen".

Nga kyrpad ba phin plied Ka Bible bad pule ia ki dhkot ba la sot na ka Bible ha ka por ba phi pule ia Kane ka khubor

Mynta ka sngi nga kwah ba ngin ia puson lang shaphang kawei ka phang kaba shon bha ha ka dohnud bad ka jingmut jingpyrkhat jong nga kata ka dei " U Blei bad Ka Spah"
Ia Kane ka phang la pynshongnongrim na ka Gospel U Mathaios Lynnong 6:24 
Ki ktien ba ong kumne "Ym don uba lah ban shakri arngut ki kynrad;naba un isih ia uwei,bad un ieit ia uwei;lane un bat ia uwei,bad un lyndet ia uwei.Phim lah ban shakri ia U Blei bad ia ka Spah".

Bunsien ki briew ha kine ki sngi ki tip ia kane dhkot Bible
Ba ym lah ban shakri ia U Blei bad ia ka Spah
Hynrei ngi im ha ki sngi ba bun ki briew ki beh ia ka Spah Pyrthei
Haba ong Spah Pyrthei hangne ka thew ia ki jingsngewbha ba kane ka Pyrthei ka ai
Bun ki ong ngi dei Khristan 
Hynrei ka kam bad ka jinglong jong ngi ka pynpaw ba ngi dei ne em kita ki Khristan
Bun kin kylli kin ong Kumno ngi shakri ia ka Spah?
Ngi shakri ia ka Spah da kaba ngi pynsngewbha ia lade
Kum kaba dih ia ki jingdih buiaid,dih ia ki sikret,bam ia ki jingbam kiba ngim dei ban bam,peit ia ki videos ki website kiba jakhlia,sngap ia ki jingrwai kiba don ki ktien kiba pynsngewsih ia U Blei bad kiwei kiwei
Paralok baieit to ngin pule 1 Korinth 3:16-17 " Phi phim tip ba phi long ka iing shong U Blei,bad ba U Mynsiem U Blei U shong sah hapoh jong phi?Te lada uno uno ruh u pynjot ia kata ka iingshong U Blei,ia uta kein U Blei un sa pynjot;namar kata ka iingshong U Blei ka long kaba Khuid,kaba long ma phi kein"
Te paralok baieit wat lada ngi dih sikret tang dep bam ja
Wat lada ngi dih ki jingdih buaid tang ha ka khawai
Hynrei to ngin kynmmaw "1 Korinth 3:16-17"
Ba ngi long ka iingshong U Blei bad ngim dei ban pynjot ia ka iingshong U Blei 
Namar lada ngi leh ia kine ki kam kiba long ka spah jong kane ka Pyrthei ngim lah ban ong ba ngi long ki Shakri  U Blei namar ka Bible ka kren shai Ba ym lah ban shakri ia U Blei bad ia ka Spah (Mathaios 6:24)
Paralok baieit to ngin pule Shithi U Paul U Apostol sha ki Galatia 6:7 "Wat shah ba yn shukor ia phi;yn ym shukor ia U Blei;namar ia kaei kaei ruh ba U briew u bet,ia kata hi un ioh ot ruh"
Te paralok baieit Lada ngi bet ia U symbai jhur,ngin sa ioh ot ia U jhur
Lada ngi bet ia ka jasarong,ngin ioh ot ia ka jingjot
Te ka long kumjuh lada ngi ieit bad shakri ia ka spah Pyrthei kam lei lei
Hynrei kynmmaw ha kawei ka sngi ngin sa ioh ban ot ia U Soh ba ngi shakri ia ka Spah Pyrthei
Namar kaei  kaei ruh ba U briew u bet,ia kata un ioh ot ruh(Galatia 6:7)
Paralok baieit um dei ba nga pyntieng ia phi hynrei kadei kaei kaba ka Bible ka ong
To ngin pule Isaiah 55:6 "Wad phi ia U Trai katba dang lah ban shem ia U,to kyrpad ia U katba u dang hajan"
Bad to ngin pule Jeremiah 29:13 "Bad phin wad ia nga,bad phin shem ia nga,haba phin wad ia nga da ka dohnud baroh"
Paralok baieit to wad noh ia U Trai wad da ka dohnud baroh bad phim Shem ia U
Paralok baieit U Blei U ieit palat ia phi
Ba U sa phah ia U Khun jong U, U Jisu Khrist ban wan iap halor ka diengphna ba ngin ioh ka jingim bymjukut
Halor ka diengphna U Jisu U la bah ia ki pop jong nga jong phi
Bad da ka snam U Jisu lah ban sait ia ki pop jong ngi
U Jisu ha ka Sngi kaba lai u la jop ia ka jingiap bad mynta U im
Bad mynta ngi dei ban ngeit ia Kane
Namar khlem ka jingngeit ngim lah ban pynsngewbha ia U Blei (Hebrew 11:6)
 Paralok baieit  hato don mo ba don ka jingieit kum U Blei
Ba kloi ban map ia ki pop jong ngi lada ngi phla ia ki pop 
Te Paralok baieit baroh shi katta phi la shakri ia ka Spah
Baroh shi katta don na pdeng jong phi kiba la pyrshang ban ieh noh ia ka Spah Pyrthei
Hynrei phim lah ban ieh
Paralok baieit ngan ong ia phi lada phi shaniah ha U Jisu
U Jisu un ai ia phi ka bor bad phin sa lah ban ieh noh ia ka Spah Pyrthei
To ngin pule Shithi U Paul U Apostol sha ki Phiipi 4:13 "Nga lah ban leh ia kiei kiei baroh ha uta uba pynshait bor ia nga"
Hynrei ban bud ia U Jisu ngi hap ban iaid ia ka lynti kaba khim (Narrow road)
Ngi hap ban len noh ia lade
To ngin pule Mathaios 16:24 Ynda Kumta U Jisu u la ong ha ki: "Lada uno uno ruh u Mon ban wan nadien jong nga, ai ba un Len ia lade, bad un rah ia ka diengphna, bad un wan bud ia nga"
Kane ka mut ba ngi hap ban ieh noh ia kiei kiei baroh kiba ngi shait leh da ka bor lade
Bad kumjuh ruh kaba ngin ieh noh ia ka Spah Pyrthei
Paralok baieit Hato phim kwah ban ieh noh ia ka Spah Pyrthei
Hato phim kwah ban long ki Jingthaw thymmai ha U Khrist
Lada U Mynsiem U Blei U Kren ia phi
Wan sha ka kjat ka diengphna
Wan kumba phi long
Pdiang noh ia U Jisu Khrist kum U Trai bad U Nongpynim jong phi
Bad phin sa long ki Jingthaw thymmai ha U Khrist
Bad phin sa ioh ka jingim bymjukut ha bneng
 Naduh Kane ka por 
U Mynsiem bakhuid un ialam ia ka jingim jong phi
Bad phin sa ioh ka bor ban jop ia ki jingpynshoi
Bad phin sa beh brai ia ka hok ym shuh ban beh brai ia ka spah
To ngin pule 1 Timothy 6:11 " Hynrei ma me,ah U briew u jong U Blei, to phet iap noh na kine kine kiei kiei ruh;bad to beh brai ia ka hok,ia ka jingriewblei,ia ka jingngeit,ia ka jingieit,ia ka jingiashah,ia ka jingjemnud"

Paralok baieit to ngan duwai nga kyrpad ia phi ba phin duwai lang ia Kane ka jingduwai "Trai Jisu nga wan ban dem ha ki sla jat kiba khuid ki jong me,Nga tip ba nga long tang U/Ka Nongpop,Nga phla ia ki pop,Ngan ieh noh ia ka Spah Pyrthei, Ngan bud bad shaniah beit tang ia me,naduh mynta ka Sngi,Ngan bah ia ka diengphna, Da Ka snam ka jong me sait ia ki pop ki jong nga,thaw thymmai ia nga Trai,ai bor ba ngan jop ia ki jingpynshoi, ai bor ba ngan ieit ia baroh, Wan ha ka dohnud ka jingim jong nga,Nga pdiang ia me Kum U Trai bad U Nongpynim jong nga,Thoh ia ka kyrteng ka jong nga ha ka kitab ka Jingim.Nga duwai ha ka kyrteng U Jisu Khrist Amen".

U Blei un kyrkhu ia phi 😇😇😇

~Gideon Rymbai



Comments

  • No Comments
Log Out?

Are you sure you want to log out?