"U Jisu Khrist U Long Kata Ka Lynti Bad Ka Jingshisha Bad Ka Jingim" Read Count : 107

Category : Notes/work

Sub Category : N/A
Nga pdiang sngewbha ia phi baroh kiba pule ia Kane ka khubor na Kane ka website ha ka kyrteng U Trai bad U Nongpynim jong ngi U Jisu Khrist.

Shuwa ba ngin iaid shakmat to ngin ia duwai Trai Jisu,ngi wan ban dem ha ki Sla jat ki bakhuid ki jong me,Trai ban ainguh ia me Trai ba me la ai  ia ngi Kane ka lad ban ioh sngew ia ka khubor na ka ktien jong me ha Kane ka website. Kren ha ngi Trai ha Kane ka por.Ngi duwai ha ka kyrteng U Jisu Khrist "Amen".

Nga kyrpad ba phin plied bad pule ka Bible ha ka por ba phi pule ia Kane ka Khubor.

Mynta ka Sngi nga kwah ban ngin ia puson lang shaphang kawei ka phang kaba la shon bha ha ka dohnud bad ka jingmut jingpyrkhat jong nga " U Jisu Khrist U long kata lynti bad ka jingshisha bad ka jingim " Kaba la pynshongnongrim na ka Gospel U Ioannis 14:5-6
Ki ktien ba ong kumne "U Thomas,u ong ha U,Ko Trai ngim tip shaei ba men sa leit;kumno te ngi lah ban tip ia kata ka lynti?U Jisu u iathuh ha U,Nga uba long kata ka lynti bad ka jingshisha, bad ka jingim de:ym don uba wan ha U Kpa,hynrei tang da nga"

Ngi iohi bun ki jingkylla kat shaba ngi phai
Ka Pyrthei ka nang kylla ha kiba bun ki liang
Ha ki por mynshuwa um don smartphone,um don online shopping bad kiwei kiwei hynrei mynta la don
Hynrei Paralok baieit U Jisu Khrist ym ju kylla
U Jisu Khrist U long kumjuh mynnin,mynta bad shaduh ki bymjukut
Ka lynti  ban poi sha bneng ruh ka long kumjuh kam shym kylla
Paralok baieit bun na phi,phim don jingsuk jingkmen
Kat shaba phai tang ki jingeh suda
Don kiba wad jingsuk,jingkmen da kaba leh Yoga
Don kiba pyrshang ban klet ia ki jing sngewsih,da kaba dih ia ki jingdih buiaid
Don kiba pynjot ia ka met lade,namar bym don jingsuk jingkmen ha ka jingim
Hynrei Paralok baieit ka Yoga kan nym lah ban wanrah jingsuk,jingkmen
Ki Jingdih buiad jong phi,kin nym lah ban pynklet ia ki jingsngewsih jong phi
Ka jingpynjot ia ka met,kan nym pynkmen ia phi
Dei tang U Jisu Khrist Uba lah ban ai ka jingsuk,jingkmen ha ka jingim jong phi
Namar U Jisu U long kata lynti bad ka jingshisha bad ka Jingim (Ioannis 14:6)
Bun na phi,nga tip phi tip shaphang U Jisu Khrist
Hynrei phim pat pdiang ia U
Namar ba phi dang kwah ban pynsngewbha ia lade da ki jingkwah brai ka doh
Namar ba phi dang Samla
Kiba la rangbah ruh ki kwah ban iaid shuwa ba ki jingsngewbha pyrthei
Ki ong ban sa phai sha U Blei da la tymmen
Bad ki mut ba kin sa ioh jingsuk,jingkmen
Ym don spah ba lah ban thied jingsuk,jingkmen 
Paralok baieit wad noh ia U Trai,wad noh ia ka Presence jong U
To ngin pule 1 Ki Khronikl 16:11 "To wad phi ia U Trai,bad ia ka bor jong U;Wad ia ka khmat jong U ha la ka Sngi"
Jeremiah 29:13 "Bad phin wad ia nga,bad phin Shem ia nga,haba phin wad ia nga da ka dohnud baroh"
Paralok baieit U Blei U ieit palat ia phi
Wat lada phim pat lah ban pynsngewbha ia U Blei
Hynrei U ieit ia phi
Bad da ngi kloi ban iehnoh ki lynti bymman jong ngi
U Blei U kloi ban map ia ngi
Bad da ka Snam U Jisu Khrist uba la iap halor ka diengphna un sait ia ki pop jong ngi
Namar don ka bor ha ka snam U Jisu
U Jisu U jop ia ka jingiap ha ka Sngi kaba lai bad U im mynta
Bad ngi donkam ban ngeit ia Kane
Namar khlem ka jingngeit ngim lah ban pynsngewbha ia U (Hebrew 11:6)
To ngin pule Isaiah 1:16 "To sait phi, pynkhuid ia lade,bred noh ka jingsniew ki kam jong phi na khmat jong nga:iehnoh ia kaba lehsniew"
1 Ioannis 1:9 "Lada ngi phla ia ki pop jong ngi,u long uba iaineh bad uba hok,ban map noh ia kita ki pop jong ngi bad ban pynkhuid ia ngi na kabym hok baroh"
Namar U Jisu U shym la wan ban khot ia kiba hok,hynrei ia kiba pop sha ka jingkylla kaba mut(Loukas 5:32)
Paralok baieit U briew un nym sngewthuh ia ka jingim la jong bad un nym ioh jingsuk,jingkmen kat ba ym pat pdiang ia U Jisu Khrist
To ngin pule Eseziek 36:26 "Ngan ai ruh ka dohnud thymmai ha phi,bad ka Mynsiem thymmai de ngan buh hapoh jong phi;bad Ngan khlaw ia ka dohnud maw na ka doh jong phi,bad ngan ai ka dohnud doh ha phi"
Paralok baieit U Blei u lah ban ai ka dohnud thymmai kaba dap da ka jingieit, jingsuk,jingkmen bad kaba lah ban ieit ia baroh 
Paralok baieit Wan sha U Jisu Khrist
Kane kadei ka por kaba biang bha
Ba phin Pdiang ia U Jisu Khrist
U Jisu u ong "To wan ha nga, phi baroh kiba thait bad ba khia ka jingkit,te ngan pynjem ia phi(Mathaios 11-28)"
Baroh shi katta phim pat ju ioh ka jingsuk,jingkmen
Baroh shi katta phi la wad ka lynti phim Shem
Mynta Wan sha kata ka lynti ka jingshisha bad ka Jingim kaba long U Jisu Khrist
Wat nym lehrain,wat nym ong kumno ki Paralok kin ong lada nga iehnoh ki kam sngewbha Pyrthei ba ngan bud noh ia U Jisu
Lada U Mynsiem U Blei U la kren ia phi,wan mynta nai pynslem shuh
Wat Lada don kiba beiñ ia phi,ba phi Bud ia U Jisu Khrist wat sngewlehraiñ
Namar 1 Petros 4:16 "Hynrei lada uno uno ruh u shah shitom kum U Khristan,wat ai un sngew lehrain,hynrei to un pyndonburom ia U Blei ha Kane ka kyrteng"
Namar ha kaba khatduh,phin ioh ka jingsuk,jingkmen bad ka jingim bymjukut ha bneng 
Namar baroh uba ngeit ha U Jisu Khrist un ioh ka jingim bymjukut
Paralok baieit ka por ba phi pdiang ia U Jisu Khrist kum U Trai bad U Nongpynim 
U Mynsiem bakhuid un sa ialam ia ka jingim jong phi,naduh kata ka por phin sa lah ban jop ia ki jingpynshoi
To ngin pule Ioannis 14:15-17 "Lada phi ieit ia nga,to sumar ia ki hukum jong nga.Nga ruh ngan duwai ia U Kpa,te un ai ha phi ia uwei pat U Nongpyntngen,ba un ioh iaisah lem bad phi ha la ka rta,ia U Mynsiem ka jingshisha keiñ;ia uba ka pyrthei kam lah ban pdiang,naba kam iohi ia U,lymne kam ithuh ia U:phi Hynrei phi ithuh ia U,namar u iaisah bad phi,un long ruh bad phi"
Paralok baieit naduh kata ka por phin sa long ki jingthaw thymmai  ha U Khrist kaba mut kiba la Kha Pat (Born again)
Bad phin sa ioh ka jingim bymjukut
Namar ban poi sha bneng ngim lah ban shna hi ka lynti
Hynrei don tang kawei ka lynti 
Ba kata kadei kata ka lynti bad Jingshisha bad ka Jingim kaba long U Jisu Khrist
To ngin pule Ephesos 2:8-9 "Namar da ka jingaiei la pynim ia phi,da ka jingngeit keiñ;kata ruh ym na phi;ka long ka jingai U Blei; ym da ki jingleh keiñ,ba uno uno ruh in ym ioh ban sngew sarong"
 Paralok baieit to ngin pdiang noh ia U Jisu Khrist kum U Trai bad U Nongpynim jong ngi
Bad ngin sa ioh mad ka jingsuk, jingkmen
Namar U Jisu u long kata ka lynti,bad ka jingshisha, bad ka jingim de;ym don uba wan ha U Kpa,hynrei tang da nga (Ioannis 14:6)

To ngan duwai,Phi lah ruh ban duwai lang kane ka Jingduwai "A Blei,nga ainguh ia me ba me la ai ia nga sa Kane kawei ka lad ban kylla kaba mut,nga tip ba me ieit ia nga,wat lada nga la leh bun ki pop,namar dei da Ka jingieit ka jong me,ba me la phah ia U Khun ba marwei jong me,U Jisu Khrist ban iap halor ka diengphna na bynta ki pop jong nga,Mynta nga ngeit ba U Jisu u la iap halor ka diengphna bad u la mihpat ha ka Sngi kaba lai,bad mynta u im,naduh mynta nga kloi ban iehnoh ki jingsngewbha pyrthei baroh, nga kloi ban bud ia U Jisu, nga kloi ban bah ka diengphna, bad naduh mynta ngan pdiang ia U Jisu Khrist kum U Trai bad U Nongpynim bad Ngan bud bad shaniah beit tang ia U,Nga duwai ha ka kyrteng U Jisu Khrist " Amen"

U Blei un kyrkhu ia phi 😇😇😇
~Gideon Rymbai








Comments

  • No Comments
Log Out?

Are you sure you want to log out?